قصيدة انا كنت عبيط للشاعر هشام الجخ

قصيدة انا كنت عبيط

كلماتها

من كام شهر خدت قرار
مش ها أكتب شعر

وإنى ها أذاكر وأنجح وأفلح
وأخد البكالوريوس
وأتجوز
واشترى عفشتى بالتقسيط
من كام شهر أنا كنت عبيط

من كام شهر زرعت المية
وطرحت فجلة
جاب العجل الفجلة العجلة
وقال لها مهرك
ريحة قهرك
فايحة فى نهرك
قالت اوعى تعيش كسلان
بابا نويل بيوزع يويو فى حرب ايران
شامم ريحة جبنة قديمة
فيلم السهرة ما كانش سياسى
كان عباسى
عبد الناصر حب يقلد فينا الروس
ساوى الروس
لبرل نفسك لجل ما تبقى مثقف زى صاحبنا اياه
عندك ماركس .. عندك هيكل
عندك حسن البنا وحقى
عندك زحمة صفى ونقى
منحنى أرض النسكافية
واخد إفيه
حاصل ضرب النكسة
فى حرب اكتوبر
فى معاهدة ديفيد
بيساوى حاصل ضرب النار
فى الدار ... فى العار !!
مرفوعة لأس اتنين مخاويت
وزى إمرؤ القيس وجلامده
اللى بتنزل من على
عندينا واد اسمه على
بيطلع الدبابة ويلف بيها فى البلد
ومراته دايرة بشعرها تدور عليه
وما تسألوش أنا قصدى أيه ؟
انا نفسى مش فاهم كلامى ؟!
انا نفسى مش فاهم كلامى
بس الكلام واعر .. حويط
أنا ال دون الناس عبيط

من كام شهر وكنت با أحبك
كنت با أوضب روحى وأحبك
لجل ما أقابلك
كنت بكل حالاتك قابلك
تفرحى قابلك
تزعلى قابلك
تتقلى قابلك
كنت الأرض وكنت سنابلك
كنت الحرب وكنت قنابلك
حتى ف بعدك وانتى مسافرة
وبينى وبينك ألف محطة
كنت با اقابلك
عمرى يا نانا ما قلبى اتنازل
ولا ساب حقه زى ما ساب لك
عمره ما ضحى
بسهده وسهره
وجاب من عمره زى ما جاب لك

هذا الوجع بقاياك
سحر تبدد بين ضلعى
توارى خلف سلم منزلك
ترك لك رسالة كل صباح
وسافر
يشهد عليكى السلم المستنى خطوتنا
تشهد عليكى الشبابيك ال فتحتيها علشانى فى نص الليل وعز البرد
يشهد عليكى محل الهدايا ال ع الناصية وكشك الورد
تشهد عليكى هدومك ال قلت لك ما تلبسيهاش
تشهد عليكى امتحاناتى ال علشانك ما دخلتهاش
تشهد عليكى وتني هوستن .. جورج مايكل
عم شوقى بتاع الفطير
كيف يصير الحال كدا ؟!
م ال ابتدا أنا ال غلطان لك
وأنا ال محقوق لك
وأنا ال دون الناس عشقتك
كنت عايش جوا صدرك حلم دافى
كنت با أنسى الناس وأجيلك
يوم ميعادك ( ياكش ) حافى
كنت أبسط من البسيط
واكتشفت إنى ف هواكى كنت دون الناس عبيط